Áður en David Cameron tók við í Bretlandi las ég skemmtilega bók sem kallast Waiting for the Etonians. Hún er eftir þann ofurskarpa blaðamann Nick Cohen, og segir þá furðulegu sögu að á tíma efnahagskreppu var að komast til valda hópur manna sem var menntaður í einkaskólum yfirstéttarinnar – eins og Eton.

Þessu hefur nýlega verið lýst með öðrum hætti. Þar er sagt að The Drones séu við völd í Bretlandi. Drones er klúbburinn þar sem Bertie Wooster, sögupersóna P.G. Wodehouse, er meðlimur ásamt fleiri yfirstéttardrengjum.

Nú er einn þeirra í vandræðum. Hann er reyndar ekki menntaður í Eton, heldur skóla sem nefnist Rugby. Þetta er Andrew Mitchell, sem David Cameron gerði að þingflokksformanni Íhaldsmanna (chief whip) eftir breytingar á stjórninni nýskeð.

Mitchell var á hjóli og lögreglumenn vildu ekki hleypa honum út um hlið við Downingstræti 10.

Hann brást ókvæða við, samkvæmt lögreglumönnunum hreytti hann út úr sér:

„Best learn your fucking place. You don´t run this fucking government. You fucking plebs.“

Það þykir ekki gott að kalla lögreglumenn plebba og segja að þeir þekki ekki sinn stað í tilverunni – sérstaklega ekki ef maður er valdamikill yfirstéttarmaður í landi sem er haldið ofurnæmi gagnvart stéttaskiptingu.

Mitchell hefur þrætt fyrir að hafa sagt þetta, en almenningsálitið og fjölmiðlarnir hallast að því að trúa lögreglumönnunum – þessi orð eru meira að segja komin í skýrslu um atvikið.

Margir telja að Cameron eigi engra annarra kosta völ en að reka hinn snobbaða og hrokafulla yfirstéttarmann.