Athyglisverð er niðurstaða skoðanakönnunar Félagsvísindastofnunar sem Morgunblaðið birtir í morgun. Þarna er reynt að mæla áhrif skuldamála á fylgi flokka og ríkisstjórnar.

Auðvitað eiga hlutirnir eftir að setjast betur – en merkilegt er að sjá að þetta hefur ekki áhrif á heildarfylgi ríkisstjórnarinnar. Það er 43,4 prósent.

Framsókn rýkur hins vegar upp eftir niðursveiflu sem hefur staðið allt síðan í kosningunum í vor, mælist með 20,1 prósenta fylgi. Þetta er samt enn meira en 4 prósentustigum frá fylgi flokksins í kosningunum.

Sjálfstæðisflokkurinn missir hins vegar fylgi, er aðeins með 23,3 prósent sem þykir afar slakt á þeim bæ.

Það er athyglisvert að sjá að Samfylking, VG og Björt framtíð hafa svipað fylgi allir flokkarnir, Samfylking er með 15,8, VG með 14,1, Björt framtíð með 13,7.

Það er semsagt enginn afgerandi forystuflokkur stjórnarandstöðumegin, en þegar Píratar bætast við með sín 7,7 prósent hefur stjórnarandstaðan talsvert meira fylgi en ríkisstjórnin.