Stóri dagurinn er á morgun. Tilkynnt um niðurstöður í skuldamálum í Hörpu klukkan 4.

Fyrir Framsóknarflokkinn er þetta örlagadagur. Það má gera því skóna að framtíð flokksins ráðist á morgun. Fylgið hefur verið að rjátlast af honum síðan í kosningum, ef kjósendur telja að flokkurinn sé að skila sínu í skuldamálum má búast við að fylgið rjúki upp aftur.

Ef ekki, ef þetta verður talið ófullnægjandi, þá bíður flokksins stanslaus varnarbarátta – og jafnvel endalok setu í ríkisstjórn.

Og svo er náttúrlega hugsanlegt að andstæðingar Framsóknarflokksins óttist að þetta verði eitthvað.

Það hafa verið í gangi þungar samningaviðræður milli stjórnarflokkanna síðustu daga – það er ekki eins og tillögurnar hafi komið fullsmíðaðar úr skuldaniðurfellingarnefndinni. Hún var að miklu leyti skipuð trúnaðarmönnum Framsóknar.

Það þurfti líka að fá blessun Sjálfstæðisflokksins – þar á bæ ríkja miklar efasemdir í garð skuldaúrræða.

Nú bíðum við og sjáum hver niðurstaðan verður. Hvað verða beinar skuldaniðurfellingar, hvað verða tilfærslur eins og hugmyndir um að nýta séreignarlífeyrissparnað, hvað þetta verður mikið og hverjir njóta, hverjir eigi að borga eða hvaðan peningarnir eigi að koma?