Í Kiljunni í kvöld fjöllum við um nýja bók eftir Jón Kalman Stefánsson sem nefnist Fiskarnir hafa enga fætur. Sagan gerist að miklu leyti í Keflavík, þar sem Jón Kalman bjó á unglingsárum. Við förum með honum þangað, litumst um í bænum og á gamla varnarsvæðinu sem einnig kemur við sögu.

Við fjöllum um bók eftir Sigrúnu Pálsdóttur sagnfræðing, en hún ber heitið Sigrún og Friðgeir. Bókin segir frá íslenskum hjónum sem fóru til læknisnáms í Bandaríkjunum á stríðsárunum. Þeirra biðu svo hræðileg örlög þegar þau sigldu með börn sín heim til Íslands að námi loknu.

Í dag er haldið upp á að 350 ár eru liðin frá fæðingu Árna Magnússonar. Við skoðum merkilegt Sturlunguhandrit úr fórum hans, það má greina að síðurnar úr handritinu hafa verið notaðar til að sníða eftir þeim föt.

Gagnrýnendur þáttarins fjalla um Mánastein eftir Sjón og Hlustað eftir Jón Óttar Ólafsson.