Ný skoðanakönnun Félagsvísindastofnunar er ansi slæm fyrir ríkisstjórnina, en þó ekki síst Framsóknarflokkinn og forsætisráðherrann, formann hans.

Framsóknarflokkurinn er samkvæmt henni kominn niður í 15 prósenta fylgi, tapar tíu prósentustigum frá kosningunum. Hann er semsagt að komast á þær slóðir sem hann var áður en fylgisaukningin mikla var á mánuðunum fyrir kosningarnar. Það fylgi fékk hann mestanpart vegna loforða um skuldaniðurfellingar.

Sjálfstæðisflokkurinn er með 23 prósent, þremur prósentustigum minna en í kosningunum í vor. Samkvæmt þessu leitar tapað fylgi Framsóknar ekki þangað.

Skoðanakönnuni sýnir að Framsókn á ekki annarra úrkosta völ ef hann vill eiga möguleika á að halda fylginu en að efna kosningaloforð sín. En það er ekki auðvelt. Sjálfstæðisflokkurinn stímir hvað eftir annað inn í hliðina á Framsókn vegna skuldamálanna.

Ríkisstjórnin er svo samanlagt ekki með nema 38 prósent. Það er harla lítið svo snemma á kjörtímabilinu. Fylgið reytist burt jafnvel enn hraðar en hjá þeim Jóhönnu og Steingrími. Og áttu þau ekki sjö dagana sæla hvað það varðar.