Á Facebook les maður að gárungar skrifa að ríkisstjórnin hafi heykst á að leggja gistináttaskatt á ferðamenn en lagt hann í staðinn á sjúklinga.

Ýmsir eru að æsa sig nokkuð yfir þessum svokölluðu legugjöldum, en því skal spáð að þau hverfi fljótt úr fjárlagafrumvarpinu. Það eru ekki nógu miklir fjármunir í húfi til að stjórnin hætti á að missa álit vegna gjaldtöku sem virkar svona illa.

Kannski er þetta það sem heitir væntingastjórnun  – að setja eitthvað fram sem lítur nógu ansi illa út og draga það svo til baka. Þá taka menn ekki eftir hinu sem er ekki alveg eins vont.

Í frumvarpinu er haldið áfram á braut jafns og þétts niðurskurðar, það er klipið hér og þar en ýmsar heilagar kýr fá þó að vera í friði. Helst vakna spurningar um hvernig eigi að standa við fyrirheit um hagvöxt á slíkum niðurskurðartíma – það er ekki mikinn stimulus að finna í frumvarpinu – þegar einnig liggur fyrir að ekki verður hægt að keyra upp hagvöxtinn með stóriðjuframkvæmdum eða neinum hvalreka.