Sigmundur Davíð Gunnlaugsson forsætisráðherra dregur ekki af sér að boða miklar skuldaniðurfellingar, hann notar orðið róttækt í þessu sambandi. Þetta má heyra bæði á þingi og í fjölmiðlum.

En eitt er athyglisvert í þessu sambandi. Það er ærandi þögn Sjálfstæðisflokksins – samstarfsflokksins í ríkissjórn.

Úr þeim herbúðum heyrist ekki bofs um skuldaniðurfellingar.

Sigríður Rut Júlíusdóttir hæstaréttarlögmaður skrifar athyglisverða grein í nýjasta tölublað Kjarnans. Þar segir hún að með margítrekuðum yfirlýsingum um skuldaniðurfellingu kunni að myndast það sem hún kallar „réttmætar væntingar“ þeirra sem skulda verðtryggð lán.

Sigríður Rut rekur síðan hvað felst í þessum réttmætu væntingum, hvernig til þeirra hefur verið stofnað af Framsóknarflokknum. Síðan víkur hún orðum að þögn Sjálfstæðisflokksins og segir að flokkurinn verði að rjúfa hana ella verði ekki hægt að skilja afstöðu hans sem annað en þegjandi samþykki. Orðrétt segir hún:

„Þingmenn og ráðherrar Sjálfstæðisflokksins verða þó að hafa í huga að aðgerðaleysi þeirra í þessum efnum eflir
einnig þær réttmætu væntingar sem yfirlýsingar forsætisráðherra kunna að skapa. Það er vegna þess að ef ráðherrar
eða þingmenn Sjálfstæðisflokksins vilja ekki að hinar réttmætu væntingar skapist eða eflist ber þeim skylda til að taka
af öll tvímæli um slíkt á opinberum vettvangi um að ekki sé um fyrirvaralaust loforð um skuldaniðurfellingu að ræða.“