Við Íslendingar erum komnir á þann stað að við tölum afskaplega illa um stjórnmálamennina okkar – sem við höfum þó sjálf kosið.

Netið opnar aldeilis tækifærið til þessa.

Jóhanna Sigurðardóttir fékk aldeilis að finna fyrir því. Sum uppnefnin sem hún fékk voru svo andstyggileg að þau eru vart hafandi eftir. Lady Gaga var til dæmis vinsælt.

Sigmundur Davíð Gunnlaugsson er að lenda í þessu sama. Um hann ganga kjaftasögur fjöllunum hærra. Hann fer til Kanada, situr aftur í viðhafnarbíl eins og hefur lengi tíðkast á Íslendingadeginum í Gimli – hér heima ræður fólk sér ekki fyrir illkvittni.

Hann fer og hittir Obama Bandaríkjaforseta ásamt öðrum forsætisráðherrum á Norðurlöndunum og er í sitthvorum skónum vegna fótameins – það er orðið algjört aðalatriði.

En lítið er talað um það sem mörgum ætti að þykja nokkuð gott hjá forsætisráðherranum – nefnilega að hann hvatti Obama til að leita friðsamlegra lausna í Sýrlandi.