Sigmundur Davíð Gunnlaugsson sagði á Sprengisandi í morgun að nýr ráðherra Framsóknar í ríkisstjórninni yrði kynntur fljótlega og að til yrði „sterkt ráðuneyti“ sem færi með umhverfismál.

Nú er dálítið úr vöndu að ráða fyrir formanninn. Hann lagði mikið á sig til að halda Vigdísi Hauksdóttur utan ríkisstjórnar í vor og það er ekki líklegt að hann bjóði henn þetta sæti. Það er lítill vilji til að fá Vigdísi að ríkisstjórnarborðinu.

En kynjahlutfallið verður ekki gott hjá Framsókn í stjórninni ef karlmaður fær ráðuneytið. Þá varða karlarnir fjórir en aðeins ein kona. Þykir ekki gott afspurnar. Miðað við það væri Frosti Sigurjónsson, sem oft hefur verið spáð ráðherrasæti, út úr myndinni, en þó er aldrei að vita.

Þingkonurnar í flokknum eru allar óreyndar nema Sigrún Magnúsdóttir sem tók að sér, væntanlega í ljósi reynslu sinnar, að leiða þingflokkinn. Hún kemur máski til greina.

Annar möguleiki væri svo að kalla til ráðherra sem er utan þings, en það væri ekki sérstaklega í anda ríkisstjórnarsamstarfsins hingað til.