Almenningur bæði vestan hafs og austan er afar var um sig eftir hinar skelfilegu lygar sem voru notaðar til að hefja innrás í Írak – og eru þess eðlis að réttast væri að draga bæði Bush og Blair fyrir dómstóla.

Það er mjög erfitt að magna upp vilja til að hefja hernaðaríhlutun í Sýrlandi, jafnvel þótt sýna megi fram á að stjórnarherinn hafi beitt efnavopnum.

Í kvöld varð sá stóratburður í breska þinginu að þingmenn tóku ráðin af ríkisstjórninni. Stór hópur þingmanna úr Íhaldsflokknum greiddi atkvæði á móti ályktun sem opnaði fyrir hernað – og lagðist þar á sveif með þingmönnum Verkamannaflokksins.

Áður höfðu David Cameron forsætisráðherra og Ed Miliband, formaður Verkamannaflokksins, tekist harkalega á um málið. Íraksstríðið hvílir eins og skuggi yfir Verkamannaflokknum síðan á tíma Blairs.

Þetta þýðir nær örugglega að Bretland mun ekki taka þátt í neinum hernaði í Sýrlandi – þar hafa Bandaríkin misst sinn nánasta bandamann. Þetta gæti líka þýtt að önnur ríki innan Nató myndu hika.

Víkjum sögunni aðeins til Íslands. Okkar stuðningur skiptir svosem ekki miklu máli, en hann þótt þó nokkuð mikilvægur á tíma Íraksstríðsins. Fá mál hafa farið verr með Framsóknarflokkinn, sem nú er kominn aftur í ríkisstjórn, en einmitt þessi stuðningur. Hann olli miklu innanflokksdeilum og gróf mjög undan Halldóri Ásgrímssyni.

Því er líklegt að forsætisráðherrann og utanríkisráðherrann, sem báðir eru úr Framsóknarflokknum, vilji fara mjög varlega í svona málum.