A föstudagskvöld verður frumsýnd ný íslensk ópera í Skálholti. Þetta er stórviðburður í tónlistarlífinu – það er ekki oft að eru samdar íslenskar óperur. Verkið verður svo sýnt áfram laugardag og sunnudag.

Óperan er eftir hið ástsæla tónskáld Gunnar Þórðarson, textinn eftir Friðrik Erlingsson rithöfund. Efnið sækja þeir í sögu sem lengi hefur verið Íslendingum hugstæð – örlög Ragnheiðar, dóttur Brynjólfs, biskups í Skálholti.

Uppfærslan er mjög stórhuga. Þátt taka kór, fimmtíu manna hljómsveit og einsöngvarar – stjórnandinn er Petri Sakari, sem lengi var aðalhljómsveitarstjóri Sinfóníunnar.

Það verður gaman að sjá hvernig til tekst, en um leið veltir maður fyrir sér stöðu óperuflutnings á Íslandi. Íslenska óperan er komin í Hörpu og setur þar á svið kassastykki – í vetur er Carmen á dagskránni. Öðruvísi er líklega ekki talið að Óperan fylli hinn stóra Eldborgarsal. En á meðan setja Gunnar og Friðrik sína óperu upp í einkaframkvæmd og hafa þurft að leggja mikið undir til að ná þessu saman.

Söngvarar í óperunni Ragnheiði eru úr fremstu röð: Bergþór Pálsson, Þóra Einarsdóttir, Viðar Gunnarsson, Jóhann Smári Sævarsson, og Alina Dubik.