Það fer ekki framhjá neinum sem les Viðskiptablaðið að það er fremur hallt undir Sjálfstæðisflokkinn.

Ritstjórar blaðsins eru yfirleitt sjálfstæðismenn, sem og eigendur þess.

Viðskiptablaðið birtir á morgun könnun þar sem er spurt hvort fólk vildi fremur kjósa Sjálfstæðisflokkinn ef Hanna Birna væri formaður en Bjarni Benediktsson.

Það kemur svosem ekki mikið á óvart að svarið er játandi hjá mörgum – talsvert stór hópur segist fremur vilja flokkinn með Hönnu Birnu í brúnni.

En nú eru ekki nema sextán dagar til kosninga. Það er væntanlega of seint að skipta um formann – eða hvað?

Er verið að þrýsta á formannsskipti á síðustu stund með þessari könnun, eða er þetta bara til upplýsingar fyrir lesendur blaðsins?

Það er svosem líklegri skýring, en víst er að þetta hjálpar ekki Sjálfstæðisflokknum í kosningabaráttunni.