Þetta er jólaleg mynd sem er tekin á horni Austurstrætis og Lækjargötu á fyrri hluta fjórða áratugs síðustu aldar.

Við sjáum að húsin eru skreytt með jólatrjám eins og tíðkast enn.

Myndin er greinilega tekin í jólaönnum, peysufatakonan fremst á myndinni er með pakka undir hönd og leiðir barn.

Fyrir framan Útvegsbankann er vagn þar sem stendur Heitar pylsur.

Í húsinu milli Pósthússins og Útvegsbankans var verslun L.H. Müller, þar mátti meðal annars kaupa skíði og vörur til útivistar. Húsið var rifið um 1960 og nútimalegt stórhúsi byggt í staðinn.

Vörubíllinn er sérlega glæsilegur og eins strætisvagninn sem kemur keyrandi austur Austurstrætið – seinna var umferðinni beint í vestur um götuna.

Myndin birtist á Facebook-síðu sem nefnist Svipmyndir úr fortíðinni.