Það er frábært ef aflögu eru peningar, eftir langan niðurskurðartíma, til að bæta við í heilbrigðisþjónustuna og menntakerfið.

Þetta boðar Sigmundur Davíð Gunnlaugsson forsætisráðherra.

Hann nefnir líka landhelgisgæsluna – það er svo margt sem hefur setið á hakanum. Innviðir samfélagsins eru farnir að láta á sjá – einhvers staðar sá ég sagt að þeir væru farnir að „ryðga“.

Sé að verða til meira „svigrúm“ – orð sem Sigmundur er gjarn á að nota – gætum við kannski átt von á framfara- og lífskjarasókn í landinu.

Hin hliðin á peningnum eru nefnilega lífskjörin. Þeim hefur hrakað. Það er alltof margt fólk sem nær ekki endum saman. En það virðist varla mega ámálga kauphækkanir án þess að á móti komi hagræðingarkröfur. Slíkar kröfur fela yfirleitt í sér fleiri vinnustundir og færra starfsfólk. Skuldaniðurfellingin kemur ekki í staðinn fyrir launahækkanir. Nei, það þarf einfaldlega að hækka laun á Íslandi.

Sigmundur Davíð sagði sjálfur í fyrsta áramótaávarpi sínu að þyrfti að bæta kjör hinna lægstlaunuðu og rétta hlut millitekjuhópanna. Þetta er í raun einhver mikilvægasta yfirlýsing hans á ferlinum.

„Á nýja árinu og árunum sem á eftir fylgja þurfum við að auka kaupmátt Íslendinga jafnt og þétt. Það ætlum við að gera í sameiningu. Sérstaklega þarf að bæta áþreifanlega kjör þeirra lægstlaunuðu en þau eru miklu lakari en við getum talið ásættanlegt á Íslandi. En það þarf líka að rétta hlut millitekjuhópanna sem hafa tekið á sig miklar byrðar á undanförnum árum“.