Þýska ríkið keypti upplýsingar um eignir þýskra borgara í skattaskjólum og þær uppljóstranir höfðu feikileg áhrif og urðu tilefni mikilla umræðna í þarlendum fjölmiðlum. Í þessu fólst ekki síst ákveðin viðvörun, ekki bara um að skattsvikarar yrðu sóttir til saka, heldur líka að þeir gætu misst æruna ef upp um þá kemst.

Því skattsvik eru alvarlegur glæpur. Sá sem svíkur undan skatti er að láta aðra borga fyrir sig heilbrigðis- og velferðarþjónust, vegi, lögggæslu og margt margt fleira.

Nú stendur íslenskum yfirvöldum til boða að kaupa upplýsingar um skattaundanskot – og ef til vill skattsvik – fjölmargra Íslendinga. Skattrannsóknarstjóri telur að gögnin séu mikilvæg, það er fjármálaráðuneytisins að ákveða hvort þau verða keypt.

Lesandi síðunnar vildi koma eftirfarandi hugmynd á framfæri:

Ég er með hugmynd sem ég veit ekki hvernig ég á að koma á framfæri svo gagn sé í. Vonandi getur þú hjálpað mér í þessu.

Hugmyndin er (það má útfæra hana á ýmsa vegu):

Við kaupum upplýsingarnar sem eru í boði. Ef fjármálaráðherra hleypur undan ábyrgð þá á að stofna til landssöfnunar. Við megum ekki við að láta svona tækifæri ónotað.

Tilkynnt verður að þeir sem eigi peninga erlendis geti, að þýskri fyrirmynd, innan ákveðins tíma að eigin frumkvæði skilað þeim heim og sleppi þá við tugthús og kannski fleira. Brotin eru mismunandi og misalvarleg. Allir hafa þeir brotið gjaldeyrislög, sumir skattalög og sumir eitthvað enn alvarlegra. Þeir sem ekki skila inn verða sóttir til saka af fullri hörku.
Jafnvel þó ekki sé vitað fyrirfram hvort þessar aðkeyptu upplýsingar nægi til að sakfella, þá má gera ráð fyrir því að ógnin ein skili árangri.

Peningana sem koma út úr þessu mætti síðan nota til að fjármagna spítalana okkar.