Facebook vinkona mín setti þessa mynd af Hlemmtorgi á vefinn, mér sýnist hún vera tekin nálægt 1970. Þarna er biðstöðin á Hlemmi ekki risin og hið nokkuð einkennilega stórhýsi sem gnæfir yfir torgið nýtur sín ágætlega.

Húsið telst vera Laugavegur 105 og er elsti hluti þess frá 1926, teiknaður af Einari Erlendssyni, sem síðar varð húsameistari ríkisins. Það er í fúnkísstíl, en var upprunalega byggt sem bifreiðasmiðja af Sveini Egilssyni.

Margháttuð starfsemi hefur verið þarna í gegnum tíðina, banki, náttúrusafn – en nú er að flytja þarna inn alls kyns menningartengd starfsemi.

Þau svæði miðborgarinnar þar sem er að finna líf eru að stækka og breiðast út. Í kringum Hlemm eru ýmsir vaxtamöguleikar, enda mun íbúum í grenndinni fjölga mikið á næstu árum – fyrir utan ferðamennina. Í horninu á Laugavegi 105 þar sem áður var bankaútibú er nú kominn bar sem nýtur vinsælda.

Hér á myndinni sést gamla strætóskýlið við Hlemm. Það er í rauninni dálítið fallegt í laginu, þótt líklega hafi það verið óhentugt. Að minnsta kosti er það betra en hryllingurinn sem reis 1977-1978 og var eins og sérhannaður til að hýsa félagsleg vandamál.

Enda reyndist húsið vera annar af tveimur stöðum á Íslandi sem var nógu óvistlegur til að pönk gæti sprottið þar upp – hinn var skiptistöðin í Kópavogi.