Mörgum finnst kannski furðuleg hugmynd að láta mig tala við tískuhönnuðinn Calvin Klein. Ég er ekki beinlínis þekktur fyrir að vera tískugúrú og passa illa í fötin sem hann hefur hannað – nema kannski sokka og nærbuxur.

En ég gerði það nú samt í Viðtalinu í gærkvöldi. Steinunn Sigurðardóttir fatahönnuður, sem starfaði um árabil fyrir Calvin Klein og stóð fyrir komu hans hingað, vildi að ég talaði við hann.

Viðtalið snerist ekki einungis um hönnun, heldur líka um sköpunarferli, frumkvöðlahugsun, fagurfræði, viðskipti, lífið í New York, skemmtanalíf og fíkniefni.

Menn geta haft ýmsar skoðanir á tískuheiminum, en því verður ekki á móti mælt að Calvin Klein er sannur enterpreneur. Hann byrjaði með tvær hendur tómar og byggði upp stórveldi.  Það er forvitnilegt að heyra hvernig slíkir menn hugsa.

Viðtalið var tekið upp í Safni Ásmundar Sveinssonar í Laugardal. Þar er að finna þennan fallega arkítektúr og form sem sjást í bakgrunni.

Hérna má sjá viðtalið við Calvin Klein.