Nú virðist loks eiga að ljúka framkvæmdum við Laugaveg 4-6 eins og dæmið átti að líta út. Með tveimur gömlum endurgerðum húsum og tengibyggingu.

Það verður að segjast eins og er að endurgerðin hefur virkað hálf daufleg – í öðru húsinu, því minna, er Timberland-búð en ör skipti hafa verið á rekstraraðilum á Laugavegi 4. Kannski er það vegna þess að inngangurinn í húsið snýr vitlaust eða máski einfaldlega vegna þess að hús af þessu tagi, sem eru endurbyggð eftir gamalli forskrift, henta ekki sérlega vel til verslunar- eða veitingarekstrar.

Í framhaldi af því má nefna það sem gæti talist vera einhver misheppnaðasta endurbygging húss í miðbænum. Í sjálfu sér er ekkert að því hvernig húsið var endurgert, en engin starfsemi virðist þrífast í því. Það stendur á besta stað í bænum, en gluggarnir eru litlir og húsið virkar dapurt. Þarna hefur verið reynt að reka veitingastaði, en ekki gengið. Það er hugsanlegt að leiga sé mjög há, en á bak við, þar sem eitt sinn var Nýja bíó, þrífst Grillmarkaðurinn ágætlega. Kannski er fátt annað hægt að gera við svona hús en að setja upp einhvers konar safn?

Í hinum ört lifnandi Miðbæ heldur Lækjartorg áfram að vera einn ljótasti bletturinn, framkvæmdirnar á horni Austurstrætis og Lækjargötu náðu ekki að breyta því. Jón Gnarr hefur sagst vilja Héraðsdóm burt. Hann iðar svosem ekki af lífi. Torgið gæti þó farið að breyta um svip þegar byggt verður í Tryggvagötu og nær Hörpunni.