Á morgun klukkan þrjú er boðað til mótmæla fyrir utan Alþingi vegna þingsályktunar sem þá verður til umræðu á Alþingi –  um að afturkalla aðildarumsóknina að Evrópusambandinu.

Fundarboðin sjást víða á Facebook og allmargt fólk hakar við og segist ætla að mæta.

Það getur þó verið dálítið tvísýnt að boða til slíkra mótmælaaðgerða. Ef mæta fáir er hætt við að vindurinn fari úr hreyfingunni.

Við höfum séð nóg af slíkum mótmælaaðgerðum síðustu árin, en líka mótmælafundi þar sem mætti mikill fjöldi fólks og gerði ríkisstjórnir þess tíma býsna skelkaðar.

Við höfum séð tunnur, eggjakast, logandi blys, brotna glugga eftir grjótkast, táragas og brynvarðar lögreglusveitin.

Því skal spáð hér að þetta verði með rólegra móti á morgun, en sjálfsagt verður nokkur viðbúnaður.

Í fundarboðunum er sagt orðrétt:

Við förum ekki heim fyrr en á okkur er hlustað!

Það getur verið mjög hæpið að lofa slíku, eða eru menn tilbúnir að tjalda á Austurvelli í febrúarkuldanum?

Líklegt er að ríkisstjórnin sem er inni í hlýjunni hafi meira þolgæði.