Spekingi sem skrifar á Facebook varð á í messunni, fékk bjartsýniskast vegna þess að hann lagði vitlaust saman, reiknaði samanlagt fylgi Sjálfstæðisflokks og Framsóknarflokks í síðasta Þjóðarpúlsi upp í 55 prósent. Hann skrifaði:

Það verður eins og ég hef sagt: þessi ríkisstjórn mun sitja í 3-4 kjörtímabil. Eitt stórkostlegasta viðviðreisnartímabil Íslandssögunnar er rétt að hefjast. Fólkið vill meira af Sjálfstæðisflokknum og meira af Framsókn. Ævintýrin enn gerast…

Þetta reyndist svo vera rangt hjá þessum bjartsýna manni, samanlagt fylgi stjórnarflokkanna er 45 prósent samkvæmt þessari könnun. En það er svosem alveg viðunnandi fyrir flokkana.

Nú má reyndar vel vera að Sjálfstæðisflokkur og Framsóknarflokkur geti setið saman í ríkisstjórn mörg kjörtímabil. Það hefur gerst áður. Síðasta samstjórn þessara flokka entist í 12 ár. Sjálfstæðisflokkurinn tjaldar yfirleitt ekki til eins kjörtímabils þegar hann fer í ríkisstjórn – ólíkt síðustu stjórn þar sem átti að gera allt í blóðspreng og var ekki til neitt langtímaplan.

Eitt sem getur komið í veg fyrir þetta er lítil flokkshollusta meðal ungs fólks. Það er eðlilegt að pæla í hvort Sjálfstæðisflokkurinn nái nokkurn tíma aftur upp í fylgið sem hann hafði á mesta blómaskeiði sínu. Þá var markið allt upp í 40 prósent í þingkosningum. Og það er líklegt að Samfylkingin verði frekar að slást við að ná 20 prósenta markinu fremur en 30 prósentum.

Gísli Marteinn Baldursson skrifaði grein um þetta fyrir stuttu. Hann fann út að fjórflokkurinn gamli væri kominn niður í 70 prósenta fylgi. Línan stefnir niður frá því stuttu eftir hrun.

Fylgið er á miklu flökti. Það hrúgaðist til Framsóknarflokksins á vikunum fyrir síðustu kosningar en hefur að nokkrum hluta leitað þaðan aftur. En nýju flokkarnir, Björt framtíð og Píratar, sem eru ekki endilega geirnegldir á hægri og vinstri ás, eru með 22 prósent samanlagt. Ungt fólk hefur ekki áhuga á gamaldags flokksgarra og er til í að kasta atkvæðunum út um víðan völl.