Sigurveig kona mín er með sælkerabúðina sína í Bergstaðastræti 4, þar við hliðina er nú búin að opna stórglæsileg verslun Geysis, í húsnæði þar sem áður var Tösku- og hanskabúðin.

Þetta er á spotta sem er milli Laugavegs og Skólavörðustígs. Þetta er lítið steinhús og eftir því sem ég kemst næst var það byggt 1911, Páll Líndal segir í Reykjavíkurbók sinni þarna hafi áður verið tómthúsbýli sem nefndist Litlu-Bergsstaðir.

Margvísleg starfsemi hefur verið í húsinu og það er skemmtilegt að sjá hvernig hún hefur sett mark sitt á það. Þarna var í upphafi eldsmiðja og enn má sjá leifar af ofninum.

Fyrir utan húsið er svo gerði og þar er þessi krókur sem hefur verið notaður til að binda hross sem hafa verið járnuð í smiðjunni.

Í mínu ungdæmi var þarna afar smört tískuvöruverslun sem nefndist Kastalinn og voru þar jafnvel sérhönnuð föt fyrir ungt fólk eins og sjá má í þessari Morgunblaðsfrétt frá 1973. Þar er Erlingur Björnsson, gítarleikari Hljóma, að máta mjög sumarlegan jakka.

Húsið hefur svo verið notað í ýmsum tilgangi. Þarna hafa listamenn haft vinnustofur og svo var þarna lengi Árni Höskuldsson gullsmiður. Sumt í starfseminni hefur sett mark sitt á húsið.

Hér má til dæmis sjá hólk sem er á karmi útidyranna. Þetta kallast mezuzha og er komið úr gyðingdómi. Inni í honum er skjal með texta úr Torah. Fyrri ábúandi setti þetta upp og nú er það partur af húsinu. Væri fráleitt að taka það niður.

Og hér er svo húsið eins og það lítur út í dag.