CSKA Moscow tók á móti Arsenal í seinni leik liðanna í 8-liða úrslitum Evrópudeildarinnar í kvöld en leiknum lauk með 2-2 jafntefli.

Það voru þeir Dedor Chalov og Kirill Nababkin sem skoruðu mörk CSKA í leiknum en Danny Welbeck og Aaron Ramsey sáu um markaskorun Arsenal í kvöld.

Arsenal vann fyrri leikinn 4-1 og fer því áfram í undanúrslit keppninnar, samanlegt 6-3.

Arsene Wenger, stjóri Arsenal var að vonum ánægður með að vera kominn áfram í undanúrslit keppninnar.

„Ákáfinn í þeim kom okkur aðeins á óvart í byrjun en en svo róaðist leikurinn aðeins. Þeir ná að skora annað markið og voru nálægt því að bæta þriðja markinu við og þá vöknuðum við fannst mér,“ sagði Wenger.

„Þegar að við skorum fyrsta markið okkar fannst mér þetta aldrei spurning og mér fannst við alltaf líklegir til þess að bæta við og það kom loksins í uppbótartíma.“

„Við vorum vissulega í vandræðum í fyrri hálfleik. Við breyttum aðeins til í vörninni og vorum með fimm til baka í síðari hálfleik og mér fannst það virka betur. Þeir skoruðu annað mark sitt úr skoti fyrir utan en þeir opnuðu okkur aldrei í síðari hálfleik.“

„Við höfum séð óvænt úrslit í Evrópukeppnum að undanförnu og við hefðum átt að vera betur vakandi. Það getur allt gerst í þessum leikjum en ég er mjög sáttur með að vera kominn í undanúrslit keppninnar.“

„Það væri fínt að sleppa við Atletico Madrid, þeir eru sterkasta liðið í pottinum, á pappírum í það minnsta en við munum gefa öllum liðum alvöru leik í undanúrslitunum,“ sagði han að lokum.