Ríkisstjórn Svíþjóðar mun í dag taka þá ákvörðun að innleiða herskyldu á nýjan leik. Vararmálaráðherra Svíþjóðar segir að þetta sé gert af öryggisástæðum í ljósi þróunar alþjóðamála og vegna árásarhneigðar og ógnar frá Rússlandi.

Svíar afnámu herskyldu í landi sínu árið 2010 en hún hafði þá verið í gildi þar allar götur síðan 1901. Eftir að herskyldan var afnumin hefur sænski heraflinn reitt sig á að fólk gengi til herþjónustu af fúsum og frjálsum vilja. Nú telja sænsk stjórnvöld að meira þurfi til.

Yfirtaka Rússa á Krímskaga, rússnesk árásarhneigð í Úkraínu. Heræfingar færast í aukana í nágrenni Svíþjóðar og njósnir færast í vöxt,

segir Peter Hultqvist varnarmálaráðherra í flokki Sósíaldemókrata við sænska ríkisútvarpið. Hann bendir einnig á að óróleiki ríki í Miðausturlöndum.

Ef við ætlum að hafa fullskipaðan herafla þjálfaðan til stríðs þá verðum við að bæta herskyldu við kerfið.

Varnarmálaráðherrann segir einnig að það taki langan tíma að byggja upp herstyrk en það sé á hinn bóginn einfalt og fljótlegt að leggja hann af. Hann telur að gengið hafi verið of langt í að draga úr stríðs- og varnarmætti Svíþjóðar.

Svo er að sjá sem eining ríki meðal flestra sænskra stjórnmálaflokka um að taka upp herskyldu á nýjan leik. Þann 1. júlí næstkomandi verður hafist handa við að kalla inn 13 þúsund unga Svía til herþjónustu sem fæddust á árunum 1999 og 2000. Þetta fólk mun fá kennslu og þjálfum í að mæta hugsanlegri stríðsógn framtíðar grá fyrir járnum.