Sýrlenskir ríkisfjölmiðlar hafa flutt af því fregnir að ísraelskar herþotur hafi varpað sprengjum á herstöð nálægt flugvellinum í Damaskus. Ísraelar hafa ekki viljað staðfesta þessar fullyrðingar en segja þessa árás „í samræmi“ við stefnu ríkisins. BBC greinir frá.
Sýrlenskir uppreisnarmenn segja að herstöðin hafi verið notuð af Hezbollah samtökunum sem berjast við hlið yfirvalda í Damaskus gegn uppreisnarmönnum. Þar hafi verið vopnageymsla samtakanna en Ísrael leggur mikið upp úr því að koma í veg fyrir að Íranir, helstu bandamenn Hezbollah, smygli vopnum í gegnum Sýrland til aðalbækistöðva samtakanna í Líbanon.
Kort BBC sem sýnir hvar sprengingarnar urðu
Ísrael álítur Hezbollah og Írani helstu andstæðinga sína. Þessir aðilar tókust á árið 2006 í hörðu stríði sem Hezbollah sigraði. Líkt og Pressan greindi frá í gær hafa margir gagnrýnt Ísrael fyrir afskiptaleysi í borgarastríðinu í Sýrlandi en ekki er vitað hvort að þetta inngrip þeirra sé byrjunin á frekari afskiptum þeirra af stríðinu sem geysað hefur í 6 ár og kostað meira en 400 þúsund mannslíf.
Samkvæmt sýrlensku ríkisfréttastofunni Sana sprungu eldsneytistankar og vöruhús skemmdust í loftárásinni. Flugskeytum var skotið af ísraelskum herþotum sem flugu yfir hinum hernumdu Golan hæðum. Sprengingar heyrðust víða um Damaskus að sögn mannréttindasamtakanna Syrian Observatory for Human Rights.
