Dagblaðið Politiken segir frá því í dag að nokkur af stærstu fjölskyldufyrirtækjum Danmerkur hafi tekið höndum saman um að beita stjórnmálamenn miklum þrýstingi til að fá erfðaskatt felldan niður eða lækkaðan mikið. Þetta virðist hafa borið árangur því svo virðist sem meirihluti sé á danska þinginu fyrir að lækka erfðaskattinn fyrir fjölskyldufyrirtæki úr 15 prósentum í 5 prósent. Þetta kostar ríkissjóð umtalsverðar fjárhæðir.
Í umfjöllun Politiken segir að herferð fjölskyldnanna sé ein besta heppnaða herferð þrýstihóps á undanförnum árum. Fyrirtækin settu sameiginlegan þrýstihóp á laggirnar til að annast málið fyrir þeirra hönd. Ferlið hófst af alvöru 2012 þegar 12 af stærstu fjölskyldufyrirtækjum Danmerkur stofnuðu þrýstihópinn Vækst í Generationer.
Meðal fyrirtækjanna voru Bestseller, Danfoss, Foss, Haldor Topsøe og Jysk. Öll þessi fyrirtæki eru í eigu fjölskyldna sem vildu fá erfðafjárskattinn lækkaðan. Í Danmörku þarf að greiða slíkan skatt þegar fjölskyldufyrirtæki eru sett í hendurnar á nýjum ættliðum.
Vækst i Generationer réði almannatengslafyrirtækið Operate til að gera áætlun um hvernig ætti að standa að málum. Síðan var hafist handa við að þrýsta á talsmenn stjórnmálaflokkanna í hinum ýmsu málaflokkum sem snerta þennan skatt.
Politiken hefur eftir Karsten Lauritzen, skattaráðherra, að mörg fyrirtæki standi nú frammi fyrir kynslóðaskiptum í stjórn þeirra og að stjórnmálamenn hafi verið beittir miklum þrýstingi, ekki aðeins þingmenn ríkisstjórnarflokkanna heldur þingmenn allra flokka. Hann sagðist telja að þetta hafi verið réttmætur þrýstingur því skatturinn væri vandamál sem þyrfti að taka á.
Benny Engelbrecht, þingmaður jafnaðarmanna og fyrrum fjármálaráðherra, sagði að þrýstihópurinn hafi beitt vafasömum aðferðum í baráttu sinni. Hann nefndi sérstaklega til sögunnar fund í fjármálaráðuneytinu, þegar hann var fjármálaráðherra, þar sem fulltrúar þrýstihópsins kynntu sjónarmið sín. Hann sagðist hafa spurt út í röksemdir hópsins en þetta hafi endað með að embættismenn ráðuneytisins sátu öskureiðir á fundinum því fulltrúar þrýstihópsins hafi setið og logið um þau gögn sem voru lögð fram á fundinum. Hér hafi verið á ferð hagsmunagæsla sem hafi farið yfir strikið.
Aðrir þingmenn segja að þrýstihópurinn hafi kynnt þeim niðurstöður skoðanakannana sem sýndu að kjósendur þeirra vildu láta afnema erfðaskattinn.
Lækkun skattsins mun kosta danska ríkissjóðin 1,7 milljarða danskra króna á árunum 2018-2019 og 1 milljarð árlega eftir það.
