Nálega 600 nasistar tilheyrandi hinni svokölluðu „Norrænu andspyrnuhreyfingu“ marséruðu í einni fylkingu um götur Falun-bæjar í Dölum í Svíþjóð í dag. Að göngunni lokinni héldu þeir útifund á torgi í miðbænum. Bæði karlar og konur tóku þátt.

Andstæðingar nasistanna köstuðu að þeim steinum og sendu þeim tóninn. Fleiri hundruð sænskir lögreglumenn voru til staðar til að tryggja að allt færi friðsamlega fram en nasistarnir höfðu leyfi yfirvalda til að fara í göngu sína í Falun á þessum hátíðsdegi verkalýðsins.

Ekki kom til alvarlegra átaka en nokkrir andstæðingar nasistanna voru færðir á brott af lögreglunni.

„Norræna andspyrnuhreyfingin“ stóð einnig fyrir sams konar göngu á 1. maí í fyrra. Hún fór fram Borlänge-bæ skammt suðvestur af Flaun. Þá tóku um helmingi færri þátt en gerðu í dag.

Daniel Poohl ritstjóri sænska Expo-tímaritsins, sem hefur þá ritstjórnarstefnu að berjast gegn kynþáttahyggju og fasisma, segir í samtali við sænska dagblaðið Expressen í kvöld að þetta sýni að „Norrænu andspyrnuhreyfingunni“ sé óðum að vaxa fiskur um hrygg:

Þeim hefur tekist að virkja fleiri en í fyrra. Það er í samræmi við það sem við höfum séð, sem er að hreyfingin stækkar og hún hefur öðlast sess sem róttæk samtök hægri-öfgafólks á landsvísu.

Pressan greindi frá því í frétt í desember sl. að „Norræna andspyrnuhreyfingin“ stæði fyrir herferð til að fá fleiri félaga í sínar raðir.

Poohl ritstjóri Expo segir við Expressen að þessi samtök séu hættuleg. Í fjölmiðlum er bent á að innan raða þeirra séu margir þekktir ofbeldismenn sem sumir hverjir hafi hlotið dóma. Í dag sást hvar nokkrir þekktir norskir og finnskir nasistar gengu með sænskum félögum sínum í Falun.

Stefan Löfven formaður sænska Jafnaðarmannaflokksins og forsætisráðherra Svíþjóðar minntist á göngu nýnasistanna í 1. maí ræðum sem hann hélt í Landskrona og Malmö í dag.

Mér er afar illa við nasismann og hugnast illa að þeir [nasistar], skuli nú á 1. maí sem er dagur verkalýðshreyfingarinnar, marséra með sinn boðskap sem gengur út á allt annað en samstöðu og jöfnuð. Þeir mismuna manneskjum. Mér hrýs hugur við þessu,

sagði sænski forsætisráðherrann samkvæmt því er segir í frétt Expressen.