Fjölmargir íbúar grænlenska veiðimannaþorpsins Nuugaatsiaq voru sannfærð um að þeirra síðasta stund væri runnin upp þegar hafsyfirborð fjarðarins þar sem þau búa reis skyndilega og fljóðbylgja gekk á land. Þetta kemur fram í viðtölum grænlenska ríkisútvarpsins við íbúa Nuugaatsiaq.
Nú talið að einn eldri maður og foreldrar ásamt barni þeirra hafi farist í flóðbylgjunni.
Fyrsta hugsun Jakobs Simeonsen var að bjarga sleðahundunum sínum þegar hann sá flóðbylgjuna nálgast. Hundar í Grænlandi eru geymdir hlekkjaðir utandyra. Jakob hljóp að hundunum og tókst að losa einn þeirra áður en íshroðablandaður sjórinn náði honum og færði í kaf.
Ég kaffærðist rétt áður en ég barst að brúna húsinu sem stóð skamman veg fyrir ofan og meðan ég var í kafi hugsaði ég að þetta myndi ég kannski ekki lifa af. Meðan ég veltist um í sjónum fann ég skyndilega fyrir landi og barðist þá við að halda meðvitund,
hefur grænlenska útvarpið eftir honum. Jakob telur að hann hafi verið að velkjast í ísköldum sjónum í um eina mínútu.
Svo kom stærsta bylgjan og ég tók til fótanna.
Þegar hann komst ásamt fleira fólki ofar í landið leit hann um öxl og trúði ekki eigin augum:
…ég sá hvað þetta var alvarlegt sem hafði hafði gerst og ég spurði sjálfan mig: Hvað hefur komið fyrir Nuuugaatsiaq? Ég þekkti ekki byggðina aftur.
Sjá frétt: Gríðarstórt berghlaup ástæða flóðbylgja í Grænlandi.
Ivik Cortzen var stödd í húsinu sem hún býr í. Hún lýsir þessu svo:
Faðir unnusta míns er úti og hann byrjar að kalla til sonar síns. Húsið leikur á reiðiskjálfi og allt er að detta niður og þegar ég lít út um gluggann sé ég að öldurnar eru að ná að húsinu. Og ég er ein inni í því.
Ivik greip með sér þann fatnað sem hendi var næst og hjóp út.
Ég hleyp allt hvað ég get og reyni eftir fremsta megni að líta ekki um öxl. Og þó ég sé orðin næstum örmagna þá held ég áfram að hlaupa.
Mikkel Jeremiassen sveitarstjórnarfulltrúi í Nuugaatsiat segir við grænlenska útvarpið að þorpið líti nú út eins og vígvöllur að lokinni orrustu þar sem allt sé á tjá og tundri.
