Björn Bjarnason skrifar:
Rússar stefna að auknum umsvifum í heimskautahéruðum sínum ef marka má boðskap Vladimírs Pútíns Rússlandsforseta á árlegum fundi sínum þar sem hann svarar spurningum frá almenningi í beinni sjónvarpsútsendingu. Fundurinn var að þessu sinni fimmtudaginn 15. júní.
Forsetinn líkti sókninni inn á heimskautasvæðið núna við það þegar Rússakeisarar hófu landnám í Síberíu.
„Við getum óhikað sagt að veldi okkar og tækifæri aukast með auknum umsvifum í heimskautahéruðunum,“
sagði forsetinn.
Heimskautasvæðin skipta mjög miklu, þau skapa framtíð okkar Rússlands,
sagði forsetinn þegar hann svaraði manni frá St. Pétursborg sem undraðist og spurði: „Hvers vegna festum svið svona ofboðslega mikið fé á þessu svæði? Undanfarin 20 ár hefur næstum enginn einu sinni leitt hugann að því.“
Pútín lagði áherslu á orð sín og sagði „við erum komin aftur“ og hann vonaði að Rússar yrðu þar „að eilífu“. Hann sagði að í þágu þjóðaröryggis yrði að leggja höfuðáherslu á norðurslóðir:
Bandarískir kafbátar eru á verði undan strönd Noregs og það tekur aðeins 15 mínútur fyrir eldflaugar þeirra að ná til Moskvu.Við verðum að átta okkur á stöðunni, sjá hvað um er að vera, við verðum að verja þessa strönd í samræmi við það og standa vörð við landamærin.
Hann sagði einnig:
„Við skulum ekki gleyma hernaðarlegu hliðinni með tilliti til hernaðarmáttar landsins er þetta gífurlega mikilvægt svæði.“
Franz Josef land er eyjaklasi fyrir norðan rússneska meginlandið. Pútín sagði á fundinum að erlendir leiðsögumenn kæmust þannig að orði að eyjaklasinn hefði „einu sinni verið hluti Sovétríkjanna“. Taldi hann þetta áhyggjuefni. „Hvað sem öðru líður er þetta okkar land.“ Þess vegna ætti að tryggja samgönguleiðir til eyjaklasans, standa þar að atvinnustarfsemi og tryggja fullveldi Rússa yfir eyjunum.
Á fundinum ræddi Pútín einning um stórhuga uppbyggingu rússneska ísbrjótaflotans. Hann sagði að áætlun væri um að smíða fjóra LK60 ísbrjóta en einnig næstu-kynslóðar-risaskipið Lider til sögunnar.
„Árið 2025 verður lokið við smíði þessa nýja ísbrjóts, af alveg nýrri gerð, hann verður umtalsvert öflugri – tvisvar sinnum öflugri,“ sagði forsetinn. Hann viðurkenndi hins vegar að ef til vill yrði vandasamt að finna nægilega fjármuni í nýja verkefnið.
