Námuvinnsla í Afríkulýðveldinu Kongó getur staðið í vegi fyrir framleiðslu á kraftmiklum batteríum sem eru lykillinn að langdrægnum rafbílum. Í 11 blaðsíðna skýrslu rafbílaframleiðandans Tesla til fjárfesta, sem greint er frá á vef Financial Times, er aðeins einu sinni minnst á frumefnið kóbalt, er það á lista yfir efni sem ekki er að fullu tryggt að fyrirtækið geti orðið sér úti um, listinn dugar til að upplýsa fjárfesta en það segir ekki alla söguna.

60% af öllu kóbalti í heiminum kemur frá Kongó þar sem námuvinnslan er mjög ódýr, vinnslan þar annar hins vegar ekki komandi eftirspurn vaxandi rafbílaframleiðslu.

Nóg er til af kóbalti í heiminum og hægt er að vinna það úr jörðu í bæði Kanada og Ástralíu, vandinn er hins vegar sá að kóbaltið frá Kongó er svo ódýrt að það tæki langan tíma að borga sig að hefja námuvinnslu annarsstaðar. Má nefna að árið 2006 var kóbaltið úr Tenke Fungurume-námunni í suðurhluta Kongó svo ódýrt að eini hagnaður námunnar var af koparvinnslu, sem taldi aðeins um 3% af afköstum námunnar.

Rúmlega 7 til 10 ár tekur að hefja kóbaltvinnslu í nýjum námum og á meðan fjárfestar halda að sér höndum heldur það áfram að dragast. Til að draga enn frekar úr áhuga fjárfesta á nýjum kóbalt-námum er fyrirhugað að byggja nýja námu í Katanga í Kongó sem áætlað er að muni framleiða um 14 þúsund tonn af kóbalti á ári frá 2019. Það mun hins vegar ekki uppfylla áætlaða þörf rafbílaframleiðanda og því getur skortur á efninu myndað flöskuháls í framleiðslu rafbíla.