Þriðjungur Bandaríkjamanna er ánægður með störf Donalds Trump Bandaríkjaforseta, aldrei hafa fleiri Bandaríkjamenn verið óánægðir sem störf Trump og nú, en 61% Bandaríkjamanna telja hann standa sig illa. Þetta kemur fram í niðurstöðum nýrrar könnunar Quinnipiac-háskólans. Hefur hlutfall óánægðra aukist um sjö prósentustig frá því í júní síðastliðnum þegar rúm 40% töldu hann vera að standa sig vel.
Könnunin var gerð dagana 27. júlí til 1.ágúst og voru 1.125 einstaklingar á kjörskrá spurðir um ánægju sína með forsetann, könnunin náði til allra ríkja Bandaríkjanna.
Meirihlutinn telur að Trump sé ekki hreinskilinn, sé með lélega leiðtogahæfileika, væri ekki gáfaður og væri sama um almenna borgara. Þar að auki telur meirihluti að Trump hafi „reynt að spilla eða hindra rannsókn á meintum afskiptum Rússa af kosningabaráttunni í fyrra.“
Svipaða sögu er að segja af nýlegri könnun Gallup sem birt var í byrjun ágúst, sögðust þá 36% Bandaríkjamanna ánægðir með störf forsetans en rúm 60% óánægðir.
