Kröftug mótmæli eru nú í Vínarborg, þar sem nýrri hægri-stjórn Lýðflokksins og Frelsisflokksins er mótmælt. Níu mótmælagöngur hafa verið skipulagðar í Vínarborg í dag og er lögregla með mikinn viðbúnað, eða 1500 óeirðarlögreglumenn og nokkrar vatnsþrýstibyssur, en búist er við 5000 mótmælendum. Nú þegar hafa borist fregnir af notkun táragass lögreglu, þegar mótmælendur reyndu að brjótast í gegnum vegtálma lögreglu.

Frelsisflokkurinn var stofnaður eftir síðari heimsstyrjöld af fyrrum meðlimum Nasistaflokksins og sækir hugmyndafræði sína að nokkru leyti þangað, sérstaklega þegar kemur að málefnum innflytjenda. Lýðflokkurinn skartar hinsvegar hinum umdeilda Sebastian Kurz, nýja kanslara Austurríkis, sem sumir hafa kallað hinn nýja Hitler, vegna umdeildra skoðana hans á málefnum innflytjenda.

Hann er einnig nefndur „Undrabarnið“ í stjórnmálum þar í landi. Kurz og Frelsisflokkurinn komust að samkomulagi um helgina, sem gerir hina nýju ríkisstjórn þá hægri-sinnuðustu í Evrópu, en Kurz verður yngsti þjóðarleiðtoginn í heimi, 31 árs.

Báðir flokkarnir vildu takmarka aðgengi flóttamanna og hælisleitenda að landinu í aðdraganda kosninganna og virðast hafa hlotið hljómgrunn hjá löndum sínum, en Frelsisflokkurinn hlaut 32% atkvæða og var sigurvegari kosninganna, meðan Frelsisflokkurinn hlaut 26% atkvæða.
Flokkarnir deildu þó hart í kosningabaráttunni, en leiðtogi Frelsisflokksins, Heinz -Christian Strach, sakaði Kurz um að hafa stolið stefnumálum síns flokks og kallaði hann svikara. Flokkarnir sátu einnig saman í ríkisstjórn frá 2000 til 2005.