Þá er orðið ljóst hverjir það verða sem keppast um toppsætið á framboðslista Sjálfstæðisflokksins í næstkomandi borgarstjórnarkosningum. Frestur til að skila inn framboðum rann út í dag klukkan fjögur.
Áslaug Friðriksdóttir borgarfulltrúi, Kjartan Magnússon borgarfulltrúi, Eyþór Arnalds, framkvæmdarstjóri, Viðar Guðjohnsen, leigusali og athafnamaður og Vilhjálmur Bjarnason, fyrrum alþingismaður, munu taka þátt í leiðtogakjörinu. Þetta staðfestir Gísli Kr. Björnsson, formaður Varðar, fulltrúaráðs Sjálfstæðisfélaganna í Reykjavík, við mbl.is.

Einungis verður kosið um efsta sætið, en óljóst er ennþá hvernig næstu sæti raðast. Sú hugmynd var viðruð af Davíð Þorlákssyni, fyrrum formanni SUS, að Sjálfstæðisflokkurinn ætti að auglýsa eftir borgarstjóra, næði hann meirihluta. Björn Bjarnason vildi fá Frosta Sigurjónsson, fyrrum þingmann Framsóknarflokksins til liðs við Sjálfstæðisflokkinn.

Ýmis önnur nöfn voru orðuð við leiðtogakjörið, en nú liggur fyrir hvaða fimm það verða sem keppast um hnossið, ef hnoss skyldi kalla, gengi flokksins hefur verið afleitt undanfarin ár. Ljóst er á orðum ýmissa Sjálfstæðismanna að ekki er talið líklegt að þau Kjartan og Áslaug séu líkleg til stórræðna, doði og skortur á framtíðarsýn einkenni síðustu ár minnihlutans meðan Dagur borgarstjóri komist upp með hvern skandalinn á fætur öðrum, þá helst fyrirhugaða borgarlínu, sem mun verða eitt heitasta kosningamálið þetta árið.
Það er mál manna að Vilhjálmi Bjarnasyni fylgi ávallt viss ferskleiki sem komið gæti að notum í borgarstjórn. Hvort hann sé efni í borgarstjóra er annað mál þar sem hann þykir máske ekki hafa þann kjörþokka sem það embætti krefst, þó fáir standi honum á sporði í tölulegum staðreyndum. Eyþór Arnalds er hinsvegar af innanbúðarmönnum flokksins talinn búa yfir þeim kostum sem borgarstjóri þarf að hafa, og þykir hann því sigurstranglegur í leiðtogakjörinu.