Fréttablaðið birtir í dag skoðanakönnun sem sýnir nokkuð aðra stöðu en síðustu kannanir um fylgi flokka í borginni. Samkvæmt henni er meirihlutinn fallinn, en bæði Sjálfstæðisflokkur og Samfylking með tiltölulega dræmt fylgi, 28 og 27 prósent.

Þetta er símakönnun hjá Fréttablaðinu, það þýðir að hún er tekin á stuttum tíma, ólíkt til dæmis Gallup-könnun sem birtist um daginn og var tekin yfir langt tímabil. Reynslan virðist sýna að símakannanirnar dugi betur til að mæla fylgi þegar nær dregur kosningum.

Ég skrifaði um daginn pistil þar sem ég taldi að þrettán framboð yrðu í borgarstjórnarkosningunum. Mér var svo bent á að ég hefði gleymt einu, þau gætu orðið fjórtán. Það er reyndar nokkuð verk að koma saman framboðslistum, vegna fjölgunar borgarfulltrúa þurfa að vera 46 manns á þeim.

En þetta eru Sjálfstæðisflokkur, Samfylking, Vinstri græn, Píratar, Viðreisn, Miðflokkurinn, Framsóknarflokkurinn, Flokkur fólksins, Höfuðborgarlistinn, Sósíalistaflokkurinn, nýtt kvennaframboð, Íslenska þjóðfylkingin, Alþýðufylkingin og Frelsisflokkurinn.

Samkvæmt könnun Fréttablaðsins eru átta flokkar með mann inni í borgarstjórninni. Framsókn, Miðflokkurinn og Flokkur fólksins ná naumlega inn manni, en þess er að gæta að þröskuldurinn er afar lágur, þarf ekki nema svona 4 prósent til að ná kjöri.

Gróflega séð má ætla að miðað við stefnumál eigi Miðflokkurinn, Framsókn og Flokkur fólksins samleið með Sjálfstæðisflokknum, að minnsta kosti hvað áherslur í borgarskipulagi varðar. Þessir flokkar eru samanlagt með tíu menn.

Miðað við umræðu um þéttingu byggðar og umferðarmál er hins vegar líklegt að Viðreisn eigi frekar samleið með núverandi meirihluta. Viðreisn fær tvo borgarfulltrúa í könnun Fréttablaðsins, úrslitin gætu orðið á þann veginn að Viðreisn yrði í oddastöðu í borgarstjórn.