Einstaka sinnum sýnir RÚV brot úr sjónvarpsfréttatímum í Norður-Kóreu. Á þeim stundum kemst maður næst því að gapa eins og þorskur. Svo stórfurðulegir eru þessir fréttatímar. Viðkomandi þulur er yfirleitt í miklu tilfinningauppnámi, jafnvel grátandi. Slíka innlifun sér maður aldrei hjá fréttaþulum á Vesturlöndum. Norður-Kórea er annar heimur.

Fréttirnar frá Norður-Kóreu eru jafnan undarlegar. Ein slík birtist á dögunum þegar RÚV sagði frá því að ríkisfjölmiðlar í Norður-Kóreu hefðu lýst yfir stuðningi við Donald Trump með þeim orðum að hann væri vitur og framsýnn stjórnmálamaður. Á Vesturlöndum er mönnum brugðið vegna þess fylgis sem Trump nýtur í forsetakosningum í Bandaríkjunum og stjórnmálaforingjar gagnrýna málflutning hans harðlega. Hinn herskái Vladimír Pútín hefur reyndar borið lof á Trump og sagt hann vera snjallan og hæfileikaríkan. Pútín telur sjálfsagt að þarna sé um alvöru töffara að ræða

Nú kemur stuðningsyfirlýsing frá Norður-Kóreu. Þar í landi er Trump örugglega talið til tekna að vilja reisa múra á landamærum og hafa ama af innflytjendum og konum. Þessi stuðningsyfirlýsing við Trump mun hafa birst á prenti, sem er nokkur synd því við sem höfum áhuga á útsendingum norðurkóreska sjónvarpsins hefðum gjarnan viljað sjá fréttamann í miklum hugaræsingi lesa þessa stuðningsyfirlýsingu með tilheyrandi tilþrifum. Það hefði verið afar sérstakt innlegg í bandarísku forsetakosningarnar.

Við sjáum sjaldan myndir af daglegu lífi í Norður-Kóreu en það eitt að sjá sjónvarpsþul lesa fréttir sem matreiddar eru á afar sérkennilegan hátt og lesnar á jafn einkennilegan hátt gefur okkur samt mynd af þjóðfélagi sem er eins og úr bók eftir George Orwell. Það er ekki fögur mynd. Ekki sér maður hvað geti orðið Norður-Kóreu til bjargar, en líklega er þetta þjóðfélag sem mun eyðast innan frá, það þarf ekki utanaðkomandi aðstoð til þess.