Kvikmynd um Mary Poppins mun koma á hvíta tjaldið með Emily Blunt í titilhlutverkinu. Disney myndin um barnfóstruna ráðagóðu frá árinu 1964 er fyrir löngu orðin klassík en þar töfraði Julie Andrews umheiminn með frammistöðu sinni og hreppti fyrir vikið Óskarsverðlaun. Nýja myndin, sem Disney framleiðir, gerist á fullorðinsárum Banks-barnanna, Jane og Michael. Michael á þrjú börn og einn daginn kemur Mary Poppins í heimsókn og leysir úr vanda fjölskyldunnar. Áætlað er að frumsýna myndina um jól 2018.

Það er ekki létt verk að fylgja í fótspor Julie Andrews en ekki ætti að vanmeta hina hæfileikaríku Blunt. Meryl Streep sem lék á móti Blunt í The Devil Wears Prada, sagði að hún væri hæfileikamesta leikkona af yngri kynslóð sem hún hefði unnið með í langan tíma, kannski nokkru sinni. Blunt hefur fimm sinnum verið tilnefnd til Golden Globe-verðlauna, þar á meðal fyrir leik sinn í The Devil Wears Prada.

Blunt var feiminn og óöruggur unglingur sem stamaði og foreldrar hennar ýttu á hana að fara á leiklistarnámskeið til að öðlast sjálfsöryggi – með þeim árangri að í dag er hún heimsfræg og virt leikkona.