Engir glæpa- og spennuþættir eru betri en þeir bresku. RÚV hefur verið iðið við það undanfarin ár að hafa þá á dagskrá, sem er gleðiefni, en hefur gefið eftir undanfarið sem er ámælisvert. Vonandi stendur þetta til bóta. Nýr glæpaþáttur hófst reyndar á RÚV í þessari viku, Vitni, Les témoins, og er franskur. Hann virðist vera alveg ágætur. Sagan er hæfilega ógnvekjandi, líkum er rænt úr gröfum og þeim stillt upp í húsum. Aðalpersónurnar eru lögreglukona, sem virðist skynsöm og röggsöm, og rannsóknarlögreglumaður sem á dularfulla fortíð og hafði reynt að fyrirfara sér. Glæpirnir virðast vera framdir til að gera honum lífið enn leiðara en það er. Fyrsta þætti lauk á því að reynt var að myrða hinn einræna lögreglumann en tilræðismaðurinn lauk ekki verkinu heldur gekk brott. Sem var einkennilegt, tilræðismaðurinn hafði skotið margsinnis úr byssu sinni en hætti allt í einu við. En þetta var bara fyrsti þáttur af sex og margt á eftir að koma í ljós.

Þetta virðist sem sagt vera þáttur sem hægt er að horfa á. Allt annað en þessir einkennilegu bandarísku þættir sem manni finnst að RÚV hafi verið að sýna árum saman. Innsæi er einn af þessum lélegu þáttum og fjallar um sérvitran taugasérfræðing sem hjálpar yfirvöldum að upplýsa flókin sakamál. Annar þáttur sem ég man ekki nafn á fjallaði um rithöfund sem gerði það sama, aðstoðaði við lausn sakamála. Ég gerði tilraunir til að horfa á þann þátt af því aðalpersónan var rithöfundur en allt var þar svo aumt að ég gafst upp. Þeir þættir voru í endalausum sýningum. Hefnd var enn ein ósköpin, en ég held að þeim þáttum sé lokið en enn er verið að sýna Glæpahneigð þar sem aldrei vottar fyrir hugmyndaauðgi. Upptalning á þáttum eins og þessum gæti verið endalaus en nú skal látið staðar numið. Þjóðin er í góðu skapi vegna góðs gengis strákanna okkar á EM og við eigum ekki að skammast mikið þessa dagana.

Það væri samt gott að fá góðan breskan glæpaþátt á skjáinn. Og fyrst minnst er á breskt efni, hvað varð um Miröndu? RÚV sýndi fyrsta þáttinn í þessari bresku gamanþáttaröð á föstudegi fyrir mörgum vikum og síðan ekki söguna meir. Ég vil fá Miröndu aftur á skjáinn, hún er svo fyndin.