Myndband af kappanum hefur farið sem eldur í sinu um netið og er ástæðan sú að hann þykir sláandi líkur hinum látna og alræmda Jeffrey Epstein.
Myndbandið sýnir manninn aka um í sportbíl eftir hraðbraut í Flórída og heyrist sá sem tók myndbandið upp öskra að Epstein sé enn á lífi. Upptakan vakti mikla athygli á netinu og var nóg til að hrinda af stað samsæriskenningum um að Epstein sé enn á lífi.
Ökumaðurinn, sem hefur verið kallaður „Palm Beach Pete“ á samfélagsmiðlum, sagðist sjálfur hafa verið óviðbúinn viðbrögðunum.
Í myndskeiði sem hann birti síðar á Instagram sagðist hann hafa áttað sig á vinsældunum þegar síminn hans „fór yfir um“ vegna fjölda skilaboða eftir að myndbandið fór í dreifingu.
Þar lagði hann áherslu á að hann væri ekki Epstein heldur ósköp venjulegur borgari. „Ég er ekki Jeffrey Epstein. Ég er Palm Beach Pete!“
Jeffrey Epstein lést í fangelsi í Manhattan árið 2019. Dauði hans var opinberlega úrskurðaður sjálfsvíg en ýmsum samsæriskenningum hefur verið varpað fram, ýmist að hann hafi verið myrtur eða andlát hans sviðsett.
Áhugi almennings á málefnum Epsteins hefur ekki minnkað eftir að bandarísk stjórnvöld birtu ógrynni gagna sem tengjast rannsókn á umfangsmiklum brotum hans.
View this post on Instagram
