Tyrkneska stórliðið Besiktas hefur óvænt sent fyrirspurn um stöðu Kobbie Mainoo hjá Manchester United nú þegar janúarglugginn er opinn.
Mainoo, sem er aðeins 20 ára gamall, hefur átt erfitt uppdráttar á Old Trafford síðan Ruben Amorim tók við liðinu í nóvember 2024. Á yfirstandandi tímabili hefur enski landsliðsmaðurinn aðeins komið við sögu í 12 leikjum í öllum keppnum og í 11 þeirra hefur hann verið varamaður.
Samkvæmt tyrkneskum miðlum hefur Besiktas nú haft samband við Manchester United og kannað möguleikann á að fá Mainoo á láni. Tyrkirnir vilja helst semja um 18 mánaða lánssamning, sem myndi gilda út næsta tímabil.
Samningur Mainoo við United rennur út sumarið 2027, en félagið á möguleika á að framlengja hann um eitt ár. Til að slíkt lán yrði raunhæft gæti United þurft að virkja klásúluna eða bjóða Mainoo nýjan samning.
Áður hefur Napoli verið nefnt sem líklegasti kosturinn ef Mainoo yfirgefur United í vetur.
