Hin nýgifta Temi Ajibade, áður Otedola, greinir frá því hvers vegna hún og eiginmaður hennar Oluwastosin Ajibade, eða Mr. Eazi, völdu Ísland sem einn af þremur stöðum fyrir athöfnina. Hún sendi Íslendingum einnig kveðju á okkar ylhýra.
Brúðkaupið var haldið í þremur löndum, það er í Mónakó, Dúbaí og á Íslandi. Athöfnin fór fram í Hallgrímskirkju og veislan í glerhýsi sem var sérstaklega reist fyrir hana í Kjós. Engu var til sparað og er talið að giftingin hafi kostað um 15 milljóna dollara, eða tæpa 2 milljarða króna.
Nú hefur Temi, sem er leikkona og dóttir olíujöfurs, greint frá því hvers vegna Ísland var fyrir valinu í færslu á samfélagsmiðlum.
„Velkomin til Íslands!! Þegar við fórum í fyrsta skipti árið 2021 urðum við ástfangin af fólkinu, náttúrunni og orkunni í þessu landi, svo fyrir okkar hvíta brúðkaup ákváðum við að deila þessum stað með okkar sérstaka fólki,“ skrifaði hún á ensku. En á íslensku: „Ísland við elskum þig svo mikið.“
Þá greindi hún einnig frá smáatriðum varðandi brúðkaupskjólinn sinn. Fimmtán manns komu að gerð hans. Það er sjö útsaumsmenn, þrír tískuhönnuðir og fimm aðrir handverksmenn eyddu samanlagt 4590 klukkustundum að setja hann saman. Það gera rúmlega 191 sólarhringar af vinnu.
