Að keyra þjóðveg 1 hringinn í kringum Ísland er eitthvað sem margir ferðamenn gera. Bæði íslenskir og erlendir. En hvora áttina er best að fara?

Um þetta hefur skapast umræða á samfélagsmiðlinum Reddit og eru mismunandi skoðanir á þessu. Vísindalega skiptir það líka máli hvora leiðina þú ferð, réttsælis eða rangsælis.

„Ég hef verið að skoða ýmsar ferðir tengdar hringveginum og ég sé að flestir fara rangsælis. Er önnur hvor leiðin betri?“ spyr ferðamaður í færslu sem hefur fengið töluverða athygli.

Nefna sumir umferðina. Ef fleiri fara rangsælis þá sé hugsanlega betra að fara réttsælis, til að sleppa við hana.

„Ég fór réttsælis. Ég var ánægður með það því að fyrir hverja 5 til 10 bíla sem ég sá keyra rangsælis var ég með 1 eða 2 samferða mér,“ segir einn. „Þannig að það eru færri bílar til að taka fram úr.“

Skipulagning ferðarinnar skiptir einnig máli fyrir suma.

„Ég fór rangsælis. Mér fannst vera miklu meira að gera á Suður og Austurlandi og ég vildi fá adrelínið í byrjun ferðarinnar og svo slaka á í endann,“ segir einn.

Aðrir nefna að það sé betra að byrja réttsælis í ljósi þess að það sé lítið að sjá á leiðinni norður frá Reykjavík til Akureyrar. Það sé best að klára það strax og eiga svo það besta eftir.

Þá verður einnig að taka veðrið með í reikninginn í ljósi þess að þetta er Ísland. Einn nefnir að það sé best að byrja þar sem spáin er best því að veðrið breytist hratt.

Að lokum getur þetta verið spurning um sparnað. Það er ódýrara að keyra hringveginn réttsælis eins og útskýrt er í þessari grein á Vísindavefnum. Það er maður keyrir innar í landinu en ef maður keyrir hringveginn rangsælis.