Raquelita Rós Aguilar hefur hafið störf hjá Itera á Íslandi sem tæknilegur leiðtogi fyrir íslenskan markað. Hún kemur til liðs við tæknifyrirtækið með víðtæka reynslu og sérfræðiþekkingu á sviði upplýsingatækni, nýsköpunar og stafrænnar umbreytingar.

Raquelita mun leiða tæknilega stefnumótun Itera á Íslandi ásamt því að koma að verkefnum hjá núverandi viðskiptavinum og styðja við áframhaldandi vöxt og þróun á markaðnum. Raquelita er tölvunarfræðingur og hefur unnið víða bæði í tæknistörfum og sem stjórnandi.

„Það er okkur sönn ánægja að fá Raquelitu til liðs við Itera. Hún bætist við öflugt teymi Itera sem hefur þegar náð frábærum árangri, og við erum sannfærð um að hennar innsýn og leiðtogahæfileikar muni efla starfsemi okkar enn frekar,“ segir Snæbjörn Ingi Ingólfsson, framkvæmdastjóri Itera á Íslandi í tilkynningu.

Snæbjörn segir að með þessari ráðningu undirstriki Itera skuldbindingu sína við að veita framúrskarandi stafrænar lausnir og styrkja stöðu sína sem leiðandi tæknifyrirtæki á íslenskum markaði.

Itera er búið að starfa á íslenskum markaði frá árinu 2016 með góðum árangri að sögn Snæbjörns. Árið 2021 var síðan Itera ehf. stofnað til að efla enn frekar tengsl og þjónustu við íslenskan markað og til þess að vera nær sínum viðskiptavinum. Itera aðstoðar viðskiptavini sína við þróun hugbúnaðarlausna og geta komið inn í þróunarverkefni á hvaða stigi ferlisins.