Ramesh er í viðtali við breska blaðið The Sun þar sem hann lýsir slysinu og líðan sinni. Í viðtalinu segist hann vera þjakaður af sektarkennd vegna dauða bróður síns, Ajay, sem var með honum í vélinni.
Í viðtalinu kemur fram að hann hafi reynt að fá tvö sæti hlið við hlið í röð 11 við neyðarútgang vélarinnar. Þegar hann bókaði flugið og valdi sæti var hluti raðarinnar upptekinn og þurftu þeir bræður því að sitja sitthvoru megin við ganginn – Ramesh í sæti 11A upp við neyðarútganginn en Ajay akkúrat hinum megin.
Ramesh tókst á einhvern ótrúlegan hátt að lifa slysið af og skríða út um gat í braki Boeing 787-Dreamliner vélarinnar. Ajay lést hins vegar í slysinu ásamt 240 öðrum, farþegum og starfsfólki vélarinnar.
„Ef við hefðum setið saman hefðum við kannski báðir lifað þetta af,“ segir Ramesh sem er kvæntur faðir eins barns og búsettur á Bretlandseyjum.
„Ég missti bróður minn fyrir framan augun á mér. Ég hugsa stöðugt: „Af hverju gat ég ekki bjargað honum?“ Það er kraftaverk að ég lifði. Ég er líkamlega í lagi en það er hræðilegt að hafa ekki getað bjargað Ajay.“
Ramesh er nú að jafna sig eftir slysið í heimabæ sínum, Diu, á vesturströnd Indlands. Hann og Ayjay ráku fiskveiðifyrirtæki með tveimur bátum sem þeir erfðu frá föður sínum. Þegar monsúntímabilið hefst stöðvast fiskveiðarnar og hugðust þeir fara til Englands þar sem Ajay er búsettur ásamt konu og fjögurra ára syni í Leicester.
Ramesh var útskrifaður af sjúkrahúsi á þriðjudag og er hann nú í faðmi eiginkonu sinnar, sonar og yngri bróður, Nayan. Í umfjöllun The Sun kemur fram að margir íbúar Diu séu sorgmæddir þessa dagana en alls létust 14 íbúar bæjarins í fyrrnefndu flugslysi.
