Þýska lögreglan er í kapphlaupi við tímann að gefa út ákæru á hendur þýska barnaníðingnum Christian Brueckner sem er grunaður um að hafa komið að hvarfi hinnar bresku Madeleine McCann árið 2007.

Ekkert hefur spurst til Madeleine í 18 ár, eða frá því að hún var numin á brott úr sumarleyfisíbúð fjölskyldu sinnar í Praia da Luz, vorið 2007. Þýska lögreglan hefur gefið það út að hún gangi út frá því að Madeleine hafi verið myrt.

Leit hefur staðið yfir undanfarna daga á afmörkuðu svæði í Portúgal þar sem rannsakendur vonast til þess að finna vísbendingar um lík hennar. Enn sem komið er hefur ekkert fundist.

Brueckner lýkur afplánun í haust á fangelsisdómi sem hann hlaut fyrir að nauðga 72 ára konu árið 2005. Ef fer sem horfir verður honum sleppt úr fangelsi í september næstkomandi.

Ulrich Oppold, blaðamaður RTL í Þýskalandi, heimsótti Brueckner á dögunum og veitti hann honum viðtal.

Brueckner neitaði að svara spurningum um Madeleine en gaf þó til kynna að hann myndi láta sig hverfa frá Þýskalandi um leið og afplánun lýkur og fara til lands þar sem ekki verður hægt að framselja hann. Þar muni hann láta lítið fyrir sér fara vegna þess hversu þekktur hann er orðinn.

Brueckner sagðist ætla að njóta þess að fá sér „steik og bjór“ eftir að afplánun lýkur. Hann hefur áður neitað aðild að hvarfi Madeleine og þá segist hann vera dæmdur saklaus í fangelsi fyrir fyrrnefnda nauðgun árið 2005.

Christian hlaut sjö ára dóm árið 2019 fyrir nauðgunina. Þá hefur hann hlotið dóma fyrir kynferðisbrot gegn börnum, til dæmis árið 1999, 2016 og 2017.