Mikael Nikulásson fyrrum þjálfari KFA kallar eftir því að Eiður Gauti Sæbjörnsson framherji KR verði í landsliðshópnum í næsta mánuði.
Eiður Gauti hefur skorað fimm mörk fyrir KR í sumar en hann er á sínu öðru tímabili í efstu deild. Eiður er 26 ára gamall en hann kom inn hjá HK síðasta sumar og skoraði þrjú mörk.
Eiður hefur því skorað átta mörk í efstu deild á Íslandi en Mikael telur að Arnar Gunnlaugsson eigi að taka hann í hópinn þar sem Orri Steinn Óskarsson verður frá vegna meiðsla.
„Ég vil sjá hann í hópnum þar, Orri er meiddur og ég sé ekki hver er að gera betur en hann. Hann minnir mig á Nistelrooy,“ sagði Mikael um framherja KR í Þungavigtinni í dag.
„Það er ástæða fyrir því að KR sparkar mikið fram, hann vinnur alla bolta.“
Samherji Mikaels í Þungavigtinni segir það útilokað að Eiður Gauti verði í hópnum. „Eiður Gauti verður ekki í landsliðinu, ég skal segja þér það,“ sagði Kristján óli.
Mikael vill meina að enginn íslenskur framherji sé að gera betur en Eiður Gauti í dag.
„Þú skalt segja mér þá hverjir eru að gera betur, komdu með nöfnin sem eru að raða inn?, ég vildi Benóný Breka (Framherja Stockport) síðast en hann er að spila svo lítið.“
