Ritari Staksteina Morgunblaðsins sem kom út í dag segir borgarbúa hljóta að vera gríðarlega stolta af árangri Reykjavíkur sem borgin greindi frá í vikunni. 

„Stjórnendur borgarinnar eru að vísu ekki búnir að leysa leikskólavandann eða fjárhagsvandann, hvað þá skipulagsvandann eða samgönguvandann, en þó svona hér um bil.“

Árangur sem náðist er sá að borgin fékk sinn fyrsta loftslagsborgarsamning samþykktan á loftslagsráðstefnu í Vilníus í Litháen og „til að undirstrika loftslagsátakið flaug Dóra Björt Guðjónsdóttir, borgarfulltrúi Pírata og formaður umhverfisog skipulagsráðs Reykjavíkur, utan til að taka við viðurkenningunni, eða „svokölluðum mission label“, eins og Dóra Björt orðaði það.“

Staksteinar segja að það hljóti að mega treysta því, þó það hafi hvergi komið fram, að flugferðin hafi verið kolefnisjöfnuð og vel það, enda felst í „mission label“ að borgin verði kolefnislaus árið 2030. 

„Í umfjöllun á vef borgarinnar er svo greint frá því að stærsti valdur gróðurhúsalofttegunda í Reykjavík sé vegasamgöngur „og þá einna helst í gegnum notkun einkabílsins. Því þarf að finna leiðir til að fækka ferðum með einkabílnum“. 

Sem kunnugt er vinnur borgarstjórnarmeirihlutinn að þessu með því að búa til umferðartafir um alla borg. Þeir sem sitja þar fastir hugsa án efa hlýlega til loftslagsborgarsamningsins og þýðingarmikillar flugferðar Dóru.“

Ritstjórn DV veltir fyrir sér hvort flugferðir gætu verið normið til að leysa umferðarhnúana í borginni, það væri ansi þægilegt að geta bara flogið frá Reykjavík á skrifstofuna í Hlíðarsmára.