Segja má að sú leiðrétting sem ríkisstjórnin hyggst gera á veiðigjöldum sé að festa í sessi það fyrirkomulag sem löggjafinn ætlaði að hafa á gjaldtöku fyrir veiðileyfi. Síðasta ríkisstjórn ætlaði að sækja fimm milljarða í viðbót til sjávarútvegsins með því að hækka prósentuna fyrir uppsjávartegundir úr 33% upp í 45 prósent. Þetta hefði grafið undan fyrirsjáanleika og virkni kerfisins. Hanna Katrín Friðriksson, atvinnuvegaráðherra, er gestur Ólafs Arnarsonar í hlaðvarpi Eyjunnar.

Hægt er að hlusta á brot úr þættinum hér:

Eyjan - Hanna Katrín Friðriksson - 6

„Þetta er nefnilega svolítið áhugavert að vera allt í einu orðinn krossfastur í því hvort veiðigjöld eru skattur eða ekki. Það er samkvæmt einhverjum úrskurði, af því að þetta er almennt eða veltutengt og á ekki að fara í eitthvað sérstakt, þá er það rökstutt að það sé í eðli sínu einhvers konar skattheimta. En á móti kemur að veiðileyfin eru uppbyggð þannig að þau eru frádráttarbær frá tekjuskatti,“ segir Hanna Katrín.

Hún segist ekki enn hafa séð slíkan skatt, sem hægt sé að draga frá tekjuskatti. „En það er kannski ástæða til að halda því til haga hér því að það hefur náttúrlega staðið styr um nákvæmlega hvernig á að reikna veiðigjöld og þessa formúlu, 1/3 af auðlindarentunni til þjóðarinnar og 2/3 til útgerðarinnar.

Síðasta ríkisstjórn var með það í fjármálaáætlun vilja til að hækka veiðigjöldin um fimm milljarða og það átti að gera með því að breyta prósentunni í uppsjávartegundunum í 45 prósent og gott ef ekki líka að endurskoða það að þetta væri frádráttarbært frá tekjuskatti. Þetta er aðferð sem mér hugnast ekki sérlega vel vegna þess að þetta grefur undan öllum fyrirsjáanleika og því að kerfið sé að virka, að stjórnmálamenn séu að pota í þetta endalaust.“

Hanna Katrín segist frekar vilja sjá að stjórnmálamenn tryggi að kerfið sé eins og því var ætlað að gera. „Þær tekjur sem liggja til grundvallar, þær taki mið af raunverulegu verði sem fæst fyrir fiskinn og svo látum við þetta bara liggja svona eins og hægt er. Að einhverju leyti má segja að þessi leiðrétting sé að festa í sessi þessa formúlu sem hefur verið við lýði undanfarið.“

Hægt er að hlusta á hlaðvarpið í heild sinni hér: