Hinn raunverulegi landsbyggðarskattur er niðurbrot alls konar þjónustu og innviða sem átt hefur sér stað síðustu ár. Leiðréttingin á veiðigjöldunum mun skila sér í umfangsmikla uppbyggingu á samgöngum. Það jaðrar við ófyrirleitni af hálfu útgerðarinnar kalla leiðréttinguna landsbyggðarskatt þegar það var uppkaup á kvóta og lokun fiskvinnsla sem mest hefur veikt dreifðari byggðir. Hanna Katrín Friðriksson, atvinnuvegaráðherra, er gestur Ólafs Arnarsonar í hlaðvarpi Eyjunnar.

Hægt er að hlusta á brot úr þættinum hér:

Eyjan - Hanna Katrín Friðriksson - 5

„Ég ætla bara að reyna að segja að það jaðrar við að vera ófyrirleitið af útgerðinni að ásaka stjórnvöld, ríkisstjórnina, mig, um að vera að setja einhvern landsbyggðarskatt á smærri staði úti á landi þegar staðreyndin er sú að það er hagræðing, sem þessi sömu fyrirtæki hafa staðið fyrir með því að kaupa upp kvóta, flytja starfsemi og loka vinnslum, sem mætti færa rök fyrir að hafi verið stærsti áhrifavaldurinn í því hversu viðkvæm staðan er víða í hinum dreifðu byggðum,“ segir Hanna Katrín.

„Þetta hefur hins vegar verið gert í samræmi við lög, eins og ég er að lýsa – það er verðmætasköpun – en þetta hefur gengið býsna langt. Ég myndi síðan segja kannski að hinn raunverulegi landsbyggðaskattur sem fólk býr við núna er þetta niðurbrot á alls konar þjónustu og innviðum sem hefur átt sér stað síðustu ár. Vegasamgöngur ekki síst vegna þess að það er tómt mál að tala um einhverja atvinnuuppbyggingu ef samgöngur eru ekki í lagi.

Við þekkjum þetta bara öll. Hvorki fólk né fyrirtæki koma sér fyrir á stöðum sem ekki er hægt að ferðast til og frá sæmilega örugg. Þessi leiðrétting á veiðigjöldunum mun skila sér ekki síst í umfangsmikla uppbyggingu á samgöngum, það er svo einfalt.“

Hægt er að hlusta á hlaðvarpið í heild sinni hér: