Heimir Guðjónsson, þjálfari FH, var afar sáttur með að fá þrjú stig í Eyjum í kvöld. FH hafði betur 1-0 með marki frá Steven Lennon.
,,Vestmannaeyjingarnir eru með mjög gott lið og unnu á meðal annars KR í síðasta heimaleik sannfærandi. Við vissum að þetta yrði erfiður leikur,“ sagði Heimir.
,,Heilt yfir fannst mér þetta ekki fallegur fótboltaleikur en við skoruðum frábært mark og náðum að halda hreinu.“
Óvissa var um hvort skot Steven Lennon hafi farið yfir línuna í dag en Heimir treystir línuverði leiksins.
,,Ég sá það ekki. Ég var í skýlinu mínu en línuvörðurinn var með þetta 100 prósent og setti strax flaggið upp svo þetta hlýtur að hafa verið mark.“
