Roy Keane var gagnrýninn á frammistöðu Arsenal eftir markalaust jafntefli gegn Liverpool og sagði liðið hafa virkað hrætt þegar tækifærið gafst til að stíga stórt skref í titilbaráttunni.

Arsenal gat með sigri komist átta stigum á toppi deildarinnar, en þurfti að sætta sig við 0-0 jafntefli á Emirates-vellinum gegn Liverpool-liði sem var án nokkurra lykilmanna. Í viðtali við Sky Sports lét Keane orð falla af hreinskilni.

„Ef þú ert í búningsklefa Arsenal eftir leikinn þá segirðu: þetta var ekki frábært, en þú tekur stigið og heldur áfram,“ sagði Keane.

„Þetta er samt fín forysta, en frammistaðan var dálítið hikandi og það hlýtur að vera áhyggjuefni fyrir stjórann.“

Hann bætti við. „Stærri leikir eru fram undan og þegar líður á tímabilið verður allt meira stressandi. Mér fannst þeir í kvöld vera svolítið hræddir við að grípa tækifærið, þó auðvitað sé jákvætt að halda hreinu.“

Keane sagði einnig að Arsenal hefði misst af mikilvægu tækifæri til að senda skilaboð til keppinauta sinna. „Við höfum lofað Arsenal mikið, taflan lýgur ekki, þeir hafa unnið marga leiki og verið frábærir varnarlega en í kvöld vantaði smá trú,“ sagði hann að lokum.