Gabriel Martinelli sóknarmaður Arsenal hefur beðist afsökunar á framkomu sinni gagnvart varnarmanni Liverpool, Conor Bradley, eftir atvik í leik liðanna.
Atvikið átti sér stað í uppbótartíma 0-0 jafnteflis Arsenal og Liverpool á Emirates-vellinum á fimmtudagskvöld. Bradley lá þá meiddur á vellinum, en Martinelli reyndi að ýta honum út fyrir hliðarlínuna til að flýta fyrir leiknum.
Framkoman vakti mikla reiði, ekki síst hjá fyrrverandi fyrirliða Manchester United, Gary Neville, sem kallaði hegðun Martinelli „svívirðilega“ í útsendingu Sky Sports.
Bradley þurfti að vera borinn af velli á börum og sást síðar yfirgefa Emirates á hækjum. Í kjölfarið birti Martinelli afsökunarbeiðni á Instagram þar sem hann sagði sig og Bradley hafa verið í samskiptum. Hann sagðist ekki hafa gert sér grein fyrir alvarleika meiðslanna í hita leiksins og baðst einlæglega afsökunar.
Neville hafði áður hvatt Martinelli til að biðjast afsökunar og sagði að slíkt atferli væri algjörlega óásættanlegt, sérstaklega þegar leikmaður væri augljóslega alvarlega meiddur.
